मधेश प्रदेशभर तीन महिनाका लागि विपद् संकटग्रस्त क्षेत्र घोषणा

काठमाडौं, साउन ८ । सरकारले मधेश प्रदेशलाई विपद् संकटग्रस्त क्षेत्र घोषणा गर्ने निर्णय गरेपछि विपद जाेखिम न्यूनीकरण तथा व्यवस्थापन प्राधिकरणले राष्ट्रसंघीय निकायहरु, राष्ट्रिय तथा अन्तर्राष्ट्रिय गैरसरकारी संस्थाहरु र रेडक्रसलाई आफ्ना कार्यक्रमहरु आवश्यकता अनुसार परिमार्जन गरी मधेश केन्द्रित गर्न अनुरोध गरेको छ ।

सरकारले मधेश प्रदेशलाई विपद् संकटग्रस्त क्षेत्र घोषणा गर्ने निर्णय आजकाे (साउन ८) राजपत्रमा प्रकाशित भएकाे छ ।

यही असार २६ गते मधेश प्रदेश सरकारले पानीको स्रोत तथा मुहानहरु सुकि खानेपानी तथा सिंचाई कार्यमा समस्या उत्पन्न भई जनताको दैनिक जनजीवन प्रभावित भएको भन्दै मधेश प्रदेशलाई सुख्खाग्रस्त क्षेत्र घोषणा गरेको थियो ।

सरकारले साउन ७ गते बालुवाटारमा बसेको मन्त्रिपरिषद बैठकले मधेश प्रदेशलाई विपद् संकटग्रस्त क्षेत्र घोषणा गर्ने निर्णय गरेको हो।

मधेश प्रदेशका ८ जिल्लाहरूमा मनसुनमा पनि वर्षा कम हुँदा खानेपानी र सिचाईंको अभाव भएपछि सरकारले सो क्षेत्रलाई विपद् संकटग्रस्त घोषणा गर्ने निर्णय गरेको हाे ।

 मधेश प्रदेशका जिल्लाहरूमा कम वर्षाका कारण जमिनमा पानीको पर्याप्त पुनर्भरण हुन नसकेको र भूमिगत पानीको मुहान सुक्न गई सर्वसाधारणले उपभोग गर्ने खानेपानीको चरम अभाव भाेग्दै आएका छन् ।