वर्षा प्रभावित क्षेत्रको बारे छलफल गर्न समन्वय बैठक

काठमाडौं, असाेज २० । हालै देशभर परेको अविरल वर्षा र त्यसका प्रभावबारे अद्यावधिक जानकारी संकलन गर्न प्रकाेप पूर्व तयारी सञ्जाल, डिपीनेट ; गैरसरकारी संस्था महासंघ र नेपाल रेडक्रस सोसाइटीले भर्चुअल संयुक्त समन्वय बैठक आयाेजना गरेका छन्।

बैठकमा विभिन्न संघसंस्था र सरोकारवालासहित करिब १०० जनाको सहभागिता रहेको थियो। सहभागीहरूले विशेष गरी इलाम र रौतहट जिल्लामा अत्यधिक वर्षा भएको जानकारी दिएका थिए। ती जिल्लाका केही स्थानमा पछिल्ला दिनमा ३०० मिलिमिटरभन्दा बढी वर्षा रेकर्ड भएको बताइएको छ।

संयुक्त संस्थाहरूले विपद् प्रभावित क्षेत्रमा असुरक्षित नदी किनार सुदृढीकरण, माइकमार्फत समुदाय सूचना प्रसारण (ह्यान्ड माइक, मन्दिर माइक र IVR प्रणाली प्रयोग), गैरखाद्य सामग्री वितरण, सामुदायिक भान्छा सञ्चालन लगायतका गतिविधिहरू अगाडि बढाएको बैठकमा जानकारी दिइयो। तराईमा छतविहीन भएका बाढी प्रभावितलाई टेण्ट वितरण गर्न खाेज्दा टेण्ट गाड्ने ठाउँ समेत नभेटेकाेले केही दिन कुर्न बाध्य भएकाे कार्यक्रमका सहभागीले बताएका थिए ।

धेरै जिल्लाले अझै प्रारम्भिक छिटो मूल्यांकन (IRA) प्रतिवेदन नबनाएको उल्लेख गर्दै त्यसलाई घटनाको २४ घण्टाभित्र पूरा गर्न आग्रह गरिएको छ। बैठकले सम्बन्धित जिल्ला विपद् व्यवस्थापन समितिसँग नियमित बैठक, प्राथमिक आवश्यकता पहिचान, र मूल्यांकन प्रतिवेदन तीव्र रूपमा तयार गर्न सरोकारवालालाई अनुरोध गरेको छ।