पश्चिमी न्यूनचापीय प्रणालीको प्रभाव: देशका विभिन्न स्थानमा वर्षा र हिमपातको सम्भावना

काठमाडौं, वैशाख २४ । देशभर पश्चिमी न्यूनचापीय प्रणाली, स्थानीय वायू तथा नेपालको पूर्वी भू-भाग नजिक तल्लो वायुमण्डलमा रहेको न्यून चापीय क्षेत्रको प्रभाव कायम रहेकाले आगामी दुई दिन मौसम बदली र वर्षायुक्त रहने भएको छ।
मौसम पूर्वानुमान महाशाखाले बिहीबार बिहान ८ बजे जारी गरेको बुलेटिनअनुसार हाल कोशी र सुदूरपश्चिम प्रदेशसहित अन्य प्रदेशका हिमाली तथा पहाडी भू-भागमा सामान्यदेखि पूर्ण बदली रहेको छ भने तराईका अधिकांश क्षेत्रमा आंशिक बदली रहेको छ।
महाशाखाका अनुसार कोशी प्रदेशका केही स्थानमा तथा बागमती, कर्णाली र सुदूरपश्चिम प्रदेशका एक–दुई स्थानमा मेघगर्जन र चट्याङसहित हल्कादेखि मध्यम वर्षा भइरहेको छ।
यस्तै, गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भू-भागका केही स्थानमा मेघगर्जन तथा चट्याङसहित मध्यम वर्षाको सम्भावना रहेको छ। उच्च हिमाली क्षेत्रमा हिमपातसमेत हुन सक्ने महाशाखाले जनाएको छ।
तराईका केही स्थानमा पनि मेघगर्जन र चट्याङसहित हल्का वर्षाको सम्भावना रहेको जनाइएको छ। मौसम प्रणालीको प्रभावका कारण दैनिक जनजीवन, कृषि, सडक तथा हवाई यातायात प्रभावित हुन सक्ने भएकाले आवश्यक सतर्कता अपनाउन महाशाखाले आग्रह गरेको छ।
महाशाखाले नागरिकलाई मौसमसम्बन्धी पछिल्लो सूचनामा नियमित अद्यावधिक रहन पनि अनुरोध गरेको छ।