आँपकाे बगैचाबाट १४० केजी गाँजा बरामद

वीरगञ्ज, साउन १० । पर्सा प्रहरीले विशेष सूचनाका आधारमा छिपहरमाई गाउँपालिकाबाट १४० केजी लागूऔषध गाँजा बरामद गरेको छ।
जिल्ला प्रहरी कार्यालय पर्साले आइतबार जारी गरेको प्रेस विज्ञप्तिअनुसार छिपहरमाई गाउँपालिका–१ मिर्जापुरस्थित आँपको बगैँचामा लागूऔषध लुकाइराखिएको भन्ने विशेष सूचनाका आधारमा साउन ९ गते राति करिब ११:३० बजे प्रहरीले खानतलासी गरेको थियो।
इलाका प्रहरी कार्यालय पोखरिया, पर्सा र सशस्त्र प्रहरी बलको बीओपी मिर्जापुरबाट खटिएको संयुक्त प्रहरी टोलीले बगैँचाभित्र घाँसमा लुकाइराखिएको अवस्थामा १३ वटा पोकामा रहेको १४० केजी लागूऔषध गाँजाजस्तो देखिने पदार्थ बरामद गरेको प्रहरीले जनाएको छ।