वर्षाका कारण बीपी राजमार्गमा सवारी आवागमन रोक

काठमाडौं, जेठ २६ । काभ्रेपलाञ्चोक जिल्लाका विभिन्न स्थानमा शनिबार दिउँसोदेखि परेको अविरल वर्षाका कारण रोशी खोलामा बाढी आएपछि बीपी राजमार्गमा सवारी आवागमन बन्द गरिएको नेपाल प्रहरीले जनाएको छ ।
बाढीले राजमार्गका विभिन्न स्थानमा सडक कटान गरेको तथा सवारी साधन र यात्रुहरूको सुरक्षामा जोखिम बढेकाले वर्षा नरोकिएसम्मका लागि बीपी राजमार्गमा सम्पूर्ण सवारी आवागमन बन्द गरिएको उल्लेख गरिएको छ ।
प्रहरीले आवश्यक सावधानी अपनाउन तथा वैकल्पिक मार्ग प्रयोग गर्न अनुरोध गरेको छ ।