सिंगापुरको आर्थिक सफलता र भ्रष्टाचार नियन्त्रण मोडेलबारे काठमाडौंमा छलफल

काठमाडौं, जेठ २४ । सिंगापुरको आर्थिक सफलता, सुशासन प्रणाली र भ्रष्टाचार नियन्त्रणका उपायहरूबाट नेपालले सिक्न सक्ने पाठबारे राजधानीमा छलफल गरिएको छ।
नेपाल इन्स्टिच्युट फर इन्टरनेशनल कोअपरेसन एण्ड इन्गेजमेन्ट (एनआईआईसीई) ले आइतबार ललितपुरको हात्तीवनस्थित आफ्नो सेमिनार हलमा “सिंगापुरको आर्थिक सफलता र भ्रष्टाचार नियन्त्रणको नमुना : के नेपालमा लागू गर्न सकिन्छ?” विषयक छलफल कार्यक्रम आयोजना गरेको हो।
कार्यक्रममा सिंगापुरको सोसाइटी अफ फाइनान्सियल सर्भिस प्रोफेसनल्सका पूर्व अध्यक्ष लियोङ से हायनले सिंगापुरको विकास यात्रा, आर्थिक सफलताका आधार तथा भ्रष्टाचार नियन्त्रणका प्रभावकारी अभ्यासबारे अनुभव बाँडेका थिए।
उनले सिंगापुरको सफलता कुनै एक नीतिको परिणाम नभई प्रभावकारी संस्थागत संरचना, दीर्घकालीन योजना तथा बदलिँदो परिस्थितिअनुसार निरन्तर अनुकूलन गर्ने क्षमताबाट सम्भव भएको बताए। सुशासन, प्रतिस्पर्धात्मकता, व्यवसाय सञ्चालनको सहजता र भ्रष्टाचार नियन्त्रणका क्षेत्रमा सिंगापुरले हासिल गरेको अन्तर्राष्ट्रिय उपलब्धिबारे चर्चा गर्दै उनले सक्षम संस्थाको निर्माण नै विकासको प्रमुख आधार भएको उल्लेख गरे।
भ्रष्टाचार नियन्त्रणबारे बोल्दै लियोङले सिंगापुरमा कडा कार्यान्वयन, स्वतन्त्र निकाय र कडा सजायको संयोजनमार्फत भ्रष्टाचार नियन्त्रण गरिएको बताए। भ्रष्टाचारमा संलग्न व्यक्ति कानुनी दायरामा आउने सम्भावना उच्च भएकाले यसले निरोधात्मक प्रभाव सिर्जना गरेको उनको भनाइ थियो। उनले पद र हैसियतभन्दा माथि कानुनी शासनलाई राखिने भएकाले जनविश्वास कायम राख्न मद्दत पुगेको बताए।
लियोङले सिंगापुरको आर्थिक मोडेलले वित्तीय अनुशासन र सामाजिक सुरक्षाबीच सन्तुलन कायम गरेको उल्लेख गरे। सन्तुलित बजेट, विवेकपूर्ण सार्वजनिक खर्च तथा दीर्घकालीन वित्तीय दिगोपनलाई प्राथमिकता दिइएको बताउँदै उनले आवास, स्वास्थ्य सेवा र निवृत्तिभरणका क्षेत्रमा लक्षित कार्यक्रममार्फत नागरिकलाई सेवा प्रदान गरिएको जानकारी दिए।
छलफलका क्रममा नवप्रवर्तन–प्रेरित विकासलाई पनि विशेष महत्व दिइएको थियो। लियोङले नवप्रवर्तनलाई केवल प्रविधि वा वैज्ञानिक अनुसन्धानमा सीमित नगरी समस्या समाधान, सेवा सुधार र कार्यदक्षता वृद्धि गर्ने सोचका रूपमा बुझ्नुपर्ने धारणा राखे। उनले सीप विकास, सार्वजनिक सहभागिता तथा नयाँ विचारलाई प्रोत्साहन गर्ने वातावरणले सिंगापुरको विकासमा महत्वपूर्ण भूमिका खेलेको बताए।
उनले सिंगापुरको सबैभन्दा ठूलो शक्ति आफ्ना गल्तीबाट सिक्ने र समयअनुसार नीति तथा प्रणालीलाई परिमार्जन गर्ने क्षमता रहेको उल्लेख गरे। धेरै देशले सिंगापुरको सफलतामा मात्र ध्यान दिने गरे पनि त्यसका चुनौती, असफलता र नीतिगत सिकाइहरूलाई पनि अध्ययन गर्न आवश्यक रहेको उनको भनाइ थियो।
कार्यक्रमको अन्त्यमा सहभागीहरूले नेपालको सामाजिक, आर्थिक तथा राजनीतिक यथार्थलाई ध्यानमा राख्दै सिंगापुरका सान्दर्भिक अनुभव र अभ्यासहरूलाई कसरी आत्मसात् गर्न सकिन्छ भन्ने विषयमा विचार आदानप्रदान गरेका थिए।