विद्युतीय सवारीको भाडा नबढ्ने, तर यात्रुबाट बढी भाडा उठाउनेलाई कारबाही

काठमाडौँ, वैशाख ९ । सरकारले अन्तर्राष्ट्रियस्तरमा डिजेलको मूल्यवृद्धि भएपछि स्वचालित भाडा समायोजन प्रणालीअनुसार सार्वजनिक सवारीको भाडा समायोजन गरेको जनाउँदै यो वृद्धि डिजेल इन्जिन भएका सार्वजनिक सवारीमा मात्र लागू हुने स्पष्ट पारेको छ। तर, विद्युतीय सवारीको हकमा पुरानै भाडादर कायम रहेको यातायात व्यवस्था विभागले जनाएको छ।

विभागले हिजाे प्रकाशित गरेको अत्यन्त जरुरी सूचनामा भनिएको छ, “कुनै कुनै विद्युतीय सवारीसाधन प्रयोग गर्ने यातायात सेवा प्रदायकबाट यात्रा ओसारपसार गर्दा वृद्धि भएको भाडा असुलिएको, साथै यात्रुलाई यात्री टिकट समेत नदिइएको गुनासो प्राप्त भएको छ।”

विभागले स्पष्ट पारेको छ— विद्युतीय सवारीको हकमा साविककै भाडादर लागू हुनेछ। साथै, यातायात सेवा प्रदायकले यात्रुसँग भाडा लिँदा अनिवार्य रूपमा यात्री टिकट दिनुपर्ने प्रावधान रहेको उल्लेख गरिएको छ।

विभागले चेतावनी दिँदै भनेको छ, उल्लिखित व्यवस्थाविपरीत काम गरेको पाइएमा सवारी तथा यातायात व्यवस्था ऐन २०४९, नियमावली २०५४ तथा अन्य प्रचलित कानूनबमोजिम कारबाही हुनेछ।