हङकङको ताइ पोमा आगलागी : मृत्यु ९४ पुग्यो, तीन जना पक्राउ

काठमाडौं १२। ताइ पोस्थित वाङ फुक काेर्ट आवासीय परिसरमा भएको भीषण आगलागीमा मृत्यु हुनेको संख्या कम्तीमा ९४ पुगेको छ। स्थानीय अधिकारीहरूले बुधबार बिहानसम्मको तथ्यांक अद्यावधिक गर्दै यो संख्यामा एक दमकलकर्मीसमेत समावेश रहेको जानकारी दिएका छन्। ७६ भन्दा बढी घाइतेको उपचार जारी छ, जसमध्ये धेरैजसोको अवस्था गम्भीर छ।

आगो २२ नोभेम्बरकाे राति बाहिरी बाँस स्काफोल्डिङ बाट सुरु भएको प्रारम्भिक अनुसन्धानले देखाएको छ। स्काफोल्डिङमा प्रयोग गरिएको प्लास्टिक नेट र आगो प्रतिरोध नगर्ने सामाग्रीका कारण आगो तीव्र गतिमा फैलिएको हङकङ प्रहरीले जनाएको छ।

दमकलले सात ब्लक प्रभावित भएको भनी पुष्टि गरेको छ। घटना भएको कम्प्लेक्समा करिब २,००० युनिट र करिब ४,८०० बासिन्दा बसोबास गर्दै आएका थिए। उद्धारका क्रममा ९०० भन्दा बढी बासिन्दालाई अस्थायी शिविरमा सारिएको छ।

अनुसन्धानका क्रममा स्काफोल्डिङ निर्माणमा संलग्न कम्पनीका दुई निर्देशक र एक इञ्जिनियरलाई गम्भीर लापरबाहीको आरोपमा प्रहरीले पक्राउ गरेको छ। प्रहरीले निर्माण सामग्रीले न्यूनतम सुरक्षा मापदण्ड समेत नपुर्‍याएको दाबी गरेको छ।

बेपत्ता रहेका २७९ जनाबारे खोज तथा उद्धार कार्य जारी रहेको अधिकारीहरूले जनाएका छन्। उद्धार टोलीले प्रभावित ब्लकहरूमा अन्तिम पटक प्रवेश गरी संरचना सुरक्षित रहे–नरहेको मूल्यांकन पनि गरिरहेको छ।

घटनापछि हङकङभरि आगो सुरक्षाबारे चर्को आलोचना र बहस सुरु भएको छ। स्थानीय प्रशासनले सबै निर्माण र मर्मत कार्यमा प्रयोग हुने स्काफोल्डिङ तथा बाहिरी आवरण सामग्रीको निरीक्षण कडाइपूर्वक गर्ने जनाएको छ।

एजेन्सीकाे सहयाेगमा