रसुवा सीमाक्षेत्र नजिकै ठूलो ताल बन्यो, तीन दिनभित्र फुट्न सक्ने चीनको चेतावनी

काठमाडौं, भदौ ११। नेपालमा च्छोछेन खोला र पुरेपु छाङ्पो नदीको संगम नजिकै ठूलो अवरोध ताल बनेको भन्दै चीनको जलस्रोत मन्त्रालयले आगामी तीन दिनमा ताल फुट्ने जोखिम उच्च रहेको जनाएको छ।
चीनको सरकारी सञ्चारमाध्यम ग्लोबल टाइम्सका अनुसार बिहीबार बिहानसम्म उक्त तालमा करिब २० लाख घनमिटर पानी जम्मा भएको छ। तालबाट पानी बाहिरिन थाले पनि आगामी तीन दिनमा थप ३० लाख घनमिटर पानी तालमा जम्मा हुने अनुमान गरिएको छ।
चीनको जलस्रोत मन्त्रालयले तालको अवस्थालाई नजिकबाट निगरानी गरिरहेको जनाएको छ। सम्भावित ताल फुट्ने अवस्थाको प्रभाव आकलन गर्न बाढीसम्बन्धी नमुना अध्ययन तथा विश्लेषण भइरहेको र आकस्मिक उद्धारका लागि आवश्यक तयारी अघि बढाइएको समाचारमा उल्लेख छ।
यसैबीच नेपाल–चीन सीमाक्षेत्रमा आएको बाढी तथा पहिरोका कारण चीनको तिब्बत स्वायत्त क्षेत्रको चिल्लोङ बन्दरगाह आसपास पनि ठूलो क्षति भएको छ। नेपालतर्फबाट सुरु भएको पहिरोले चिल्लोङ बन्दरगाह क्षेत्रमा असर पारेपछि चिनियाँ अधिकारीहरूले उद्धार तथा राहतका लागि विभिन्न निकाय परिचालन गरेका छन्।
चिनियाँ समाचारअनुसार उद्धारमा आपत्कालीन उद्धार टोली, जनमुक्ति सेना, इन्जिनियरिङ टोली, दूरसञ्चार कम्पनी तथा राहत संस्थाहरू परिचालन भएका छन्। कठिन भौगोलिक अवस्था, निरन्तरको वर्षा र थप प्राकृतिक विपद्को जोखिमका बीच उद्धार कार्य जारी रहेको जनाइएको छ।
बिहीबार बिहानसम्म घटनामा तीन जनाको मृत्यु पुष्टि, दुई जनाको उद्धार भएको तथा ५५८ जना अझै बेपत्ता रहेको चिनियाँ पक्षले जनाएको छ। बेपत्तामध्ये २६० जना विदेशी नागरिक रहेको समाचारमा उल्लेख छ।
नेपालतर्फ रसुवाको भोटेकोशी क्षेत्रमा आएको बाढीपछि नदी प्रणालीमा थप जोखिम देखिएको अवस्थामा चीनको जलस्रोत मन्त्रालयले अवरोध ताल फुट्न सक्ने चेतावनी दिएको हो। ताल फुटेमा तल्लो तटीय क्षेत्रमा अचानक ठूलो मात्रामा पानीको बहाव बढ्न सक्ने भएकाले जोखिम क्षेत्रमा उच्च सतर्कता आवश्यक देखिएको छ।